O marisco galego, o que se produce nas rías ou na plataforma continental, goza de merecida sona pola súa excelente calidade. As condicións das augas galegas fan que os produtos mariños medren mais rápido que noutros lugares e cun sabor excepcional. O marisco haino en moitos sitios, pero o que fai singular a Galicia é a súa variedade, xa que probablemente en ningún lugar do mundo hai tal diversidade de especies.

Hainos de prezo económico como o mexillón ou o berberecho e tamén desorbitado como o camarón ou a cigala grande, pero entre eses dous prezos pódese escoller unha variada gama.